بصباح هالنهار الحلو، وببداية هالأسبوع المبارك، منرفعلك يا ربّ كل التسبيح والمجد والإكرام.

يا ربّ، الحياة هيّي أثمن شي بالوجود، وبتستحق إنّو الإنسان يجاهد كرمالا، بس معك يا يسوع كل شي مختلف وعكس منطق العالم، لأنّو الحياة معك بتستاهل حتى الإستشهاد بكل أنواعو كرمال نكون معك.

وما في أجمل من إننا نقدّم حياتنا لإلك يا ربّي يسوع لأنّو فيك منلاقي ذاتنا، وتا نلتقي فيك بدنا نحمل الصليب، مهما كان، بحبّ وإيمان ورجا.

إنت بتعرف يا ربّ، إنّو ممكن تقطع إيّام ونضعف فيها، بس كلنا إيمان ورجا بإنّو روحك القدّوس حاضر تا يقوّينا ويشجّعنا على إننا نكمّل المسيرة معك.

وإنت بتعرف يا ربّ، بإنّو لا الألم ولا الموت ولا أي شي تاني بيقدر إنّو يفصلنا عنّك وعن حبّنا لإلك، لأنّو قوّتنا هيّي فيك، وفيك وحدك يا إلهنا الحبيب.

/الخوري يوسف بركات/