صباح الأمل والفرح والسلام هوي صباحك يا ربّ اللي بيخلّينا نوعا وكلّنا رجا بيوم مليان من نورك وحبّك يا سيّد الحياة.
أسئلة كتيرة بتحيّر العقول يا يسوع، ومنها سؤال منطرحو كتير، نحنا كمؤمنين ومؤمنات، وهوي إنّو كيف إنت يا إله الكون، اللي خلقتنا بهالعالم الصعب والضايع، بتقبل إننا نضيع بمتاهات هالعالم، بس الجواب أكيد منلاقيه بكلامك، ولو ما منقبلو، وهوّي تا نعيش الحبّ ونعلّم العالم كلّو كيف بيغلب حبّك عالخطية ومعلّما.
كيف بتقبل، يا ربّ، إننا نبعد عنّك وناخد غير آلهة، والجواب كمان عندك يا ربّ، هوي إنّك ما تركتنا ولا يوم، ومن فيض حبّك اللي ما إلو حدود تجاهنا خلقتنا وعطيتنا الحرّيّة نقرّر نتبعك أو لا.
منحبّك يا ربّ، ولا شي بيقدر يبعدنا عنّك، لا آلام ولا صعوبات، ولا حتى الموت بيقدر انو يبعدنا عنّك وعن حبّنا لإلك، ورح نضل نحبّك ونمشي الطريق معك وصوبك لأنّك انت هدف حياتنا.
/الخوري يوسف بركات/
