الشمس والقمر وكل الكواكب اللي كوّنتا يا ربّ، وكل خليقة خلقتا بكلمة منّك يا إله السما والأرض، بيرفعولك كل المجد والتسبيح.

يا ربّي يسوع، الحياة معك كلها قداسة رغم صعوبتا، والقداسة بتجرّ القداسة، لهيك إنت بتدعينا تا نعيش معك وتكون حياتنا مراية لحياتك.

بس كمان الخطيّة بتجرّ الخطيّة يا ربّ، لهيك كمان بتدعينا تا نضل متمسّكين فيك ونتغلّب بقوّة الروح القدس عالتجارب.

وتا نتغلّب عالشرّ والخطيّة، بتدعينا تا نتّحد فيك بالصلاة والتأمّل والحبّ، لأننا ما رح نقدر نطلع من الخطيّة إلاّ بحبّك اللي بيتخطى محدوديّتنا وطاقاتنا.

تعا يا ربّ، وإزرع بقلوبنا حبّك تا يملّي كياننا سلام ونفرح فيك ومعك يا إلهنا الحبيب.

/الخوري يوسف بركات/