منسبحك ومنعظمك ومنباركك يا ربّ السما والأرض، ومنشكرك لأنّك عم تشرق علينا نورك بهالصباح المبارك.
ما أعظمك وما أجمل وأعذب كلامك يا ربّ، إنت اللي ما بتغشّنا، نحنا أبناءك وبناتك، وخصوصي لمّن بتعرف إننا إذا مشينا الدرب معك رح نلاقي الإضطهادات، وممكن يبغضنا الناس، ومع هيدا بتعطي الطوبى ليللي بيثبت بهالرسالة الصعبة.
ما أعظمك يا ربّ، إنت اللي شابهتنا فيك، ووعدتنا إنّو الناس رح يعاملونا متل ما عاملوك، ومصيرنا متل مصيرك، لهيك الفرح الحقيقي لمّن منتمثّل فيك يا معلّمنا وإلهنا الأوحد.
يا ربّي يسوع، نحنا بدنا نكون من هالأشخاص القلال اللي بدّن يفهمو كلامك ويعملو فيه ويعيشوه، وما بدنا نكون من الكتار كتير اللي بدن يمشو الطريق السهل والواسع، ويتلذذو بشهواتن.
/الخوري يوسف بركات/
