بنورك يا ربّ بيبلّش صباحنا، وبدفا الإيمان منكمّل نهارنا معك، تا نوصل ونستريح فيك ومعك بآخر اليوم، فكل التسبيح والتمجيد لإلك يا إله الخير.
يا ربّي يسوع، شو صعبة وقاسية، عاللي قلوبن متحجّرة واللي بيفكرو حالن حرّاس للشريعة، كلمة الحق اللي بتحمل معا الحياة.
يا ربّي يسوع، متل ما كان الكتبة والفريسيّين متمسّكين بالشريعة، بعدن خلفاؤن بينتفضو ضد كلمة الحق اللي إنت سكبت فيها من روحك تا تعطينا الحياة.
إنت الحقيقة يا ربّنا يسوع المسيح، إنت اللي ما تردّدت ولا بتتردّد إنّك تدلّنا وتقلّنا إنّو المرجع هوي الله الآب الخالق والصالح واللي بيحب ولادو وبيسهر عليون سهر الراعي على قطيعو.
تعا يا ربّنا يسوع الحيّ وكون مرجعيّتنا بكل شي منحكيه ومنعيشو، تا نشهد لإلك بكل لحظة من لحظات حياتنا.
/الخوري يوسف بركات/
