ببداية هالأسبوع المبارك، منرفعلك يا ربّ أناشيد التسبيح والمجد والشكران على كل نعمك وعطاياك.
يا يسوع، أكيد اليونانيّين اللي ما كانو يآمنو فيك، وفتّشو عنّك وإجو لعند فيليبس وطلبو إنن يشوفوك، هيدا لأنّن بحاجة لإلك، لأنّن عرفو إنّو ما في حياة ولا خلاص إلاّ فيك.
يا ربّي يسوع، إنت اللي بتعطي الحياة، وإنت اللي من فيض حبّك عالصليب، رحت تا تسكب فيهم وبكلّ البشريّة الحياة اللي ما فيها يأس.
يا يسوعنا الغالي، لا المجد الباطل، ولا المراكز، ولا الغنى ولا التسلّط، بيقدر إنّو يجبلنا السعادة وراحة البال.
تجلّى مجدك يا يسوع، بالمحبّة والأعمال الصالحة والعجايب وبالحياة المتواضعة اللي كنت عايشا فيها.
يا ربّي يسوع، بدنا نتغذّى من حبّك اللي بينفخ فينا حياة، ونتعلّم منّك كيف نعطي من ذاتنا تا نقدر نشوفك ونحبّك بالآخرين.
/الخوري يوسف بركات/
