مرق الليل ومرقت فيه أحلامنا، وطلع الصباح وحامل معو نورك يا ربّ، هالنور اللي فيه بتشرق عالدني كلا تا تباركا وتبارك خليقتك، إلك كل التسبيح والمجد.

يا ربّ، صرلنا عمر مزروعين بكرمك، وأكتر من تلات سنين اللي كنت عم تحكي فيهن عن التينة، ويعدك عم تجي كل يوم وكل لحظة تا تزور قلوبنا وتشوف إذا بلّشت تعطيك ثمر المحبّة أو لا.

يا ربّي يسوع، ياما وياما إيام بتجي وما بتلاقي فينا ولا ثمرة، وبعدك عم تصبر علينا، ونحنا بعدنا سكرانين بالخطايا وما عم نوعى على مدى حبّك لإلنا.

يا ربّي يسوع، صار الوقت إننا نحمل هالمسؤولية اللي حاطتها فينا، نعرف نستثمر العطايا والمواهب اللي زارعا فينا، ونفعّلا بحياتنا وبمجتمعنا وبمحيطنا، ونستقي من خمر حبّك وحنانك، تا نثمر محبّة وفرح وسلام.

/الخوري يوسف بركات/