شو حلوة لمن منصحا من النوم ونحسّ بإيدك مرافقتنا وببركتك علينا يا إله السما والأرض، منسبّحك ومنمجّدك ومنشكرك.
يا ربّي يسوع، إنت اللي عطيتنا المواهب تا نتاجر فيها، ورح بتطالبنا بالثمر اللي منطلعو منها، وكلّك ثقة إننا رح نكون قدّ هالمسؤولية الكبيرة اللي عاطينا ياها رغم هشاشتنا وضعفنا، بس بتضلّك بتحبّنا وتعطينا الفرص.
يا ربّي يسوع، نحنا منعرف إنّو العالم بحاجة لإلنا ولدورنا فيه بتقديس ذاتنا واللي حوالينا، ورغم هالشي عم نوقع ونستهتر ونتكاسل، ورغم هالشي بعدك بتوثق فينا إننا رح نتغيّر ونغيّر العالم لإلك.
يا ربّي يسوع، إنت مرجعيتنا وهدفنا بهالحياة، ونحنا منآمن إنّو محبّتنا لإلك بتنما بمحبّتنا للقريب، مين ما كان وشو ما كانت حالتو، لهيك رح نسعى إننا نعيش هالمحبّة بكلّ أمانة تا نقدر نحصل عا الخلاص.
/الخوري يوسف بركات/
