شو حلو الصباح اللي بيبلّش بنورك يا رب، وكل الخلايق بتمجّدك وبتشكرك على حبّك الكبير تجاها.
يا يسوعنا الحبيب، كتير من الأوقات منسمعك عم تدعينا تا نكون الأرض اللي بتستقبل كلمتك المليانة حياة، وبتتركلنا المجال إننا نختار أيّا نوع من الأرضيّة اللي بتنمّي البشارة بحياتنا.
قدّيش في أوقات عم نكون هالأرض اللي ما بتستقبل إلاّ ذاتا وبتعيش الأنانيّة وما بتعود تخليها تثمر.
قدّيش عم نكون هالأرض الصخريّة اللي منفرح للحظات إننا منعرف كلمتك، بس عدم الإلتزام والثبات فيها حجّرت قلوبنا وما عطيت ثمر.
وقديش في أوقات شوك الخطيّة تغلغل بأرضنا وصارت هموم الدني تاكلنا وقتلتنا وحرقت تربتنا تا قتلت الثمر.
بس نحنا يا ربّ، بدنا نكون هالأرض الطيبة، نتفاعل معك بكياننا وننما بإلتزامنا فيك ونثمر محبّة وشهادة.
/الخوري يوسف بركات/
