غاب القمر مع غياب الليل، وشرقت شمسك يا ربّ بهالصباح المبارك، وضوّى نورك علينا وعالخليقة كلّا، منسبّحك ومنمجّدك.

ما في أجمل من الأمثال اللي بتشبّهلنا فيها كلمتك بالزرع يا ربّ، هالكلمة اللي بتزرعا بأرضنا وبقلوبنا وبتنطرنا تا نفعّلا بحياتنا.

والأجمل يا ربّ هوي إنّك ما بتهمل حدا مننا، لا بل بتزتّ وبتزرع كلمتك بكل إنسان ، مين ما كان وبالوقت المناسب، وعلينا نحنا نقرّر النتيجة.

رائع إنت يا ربّ وأمين بحضورك الدايم معنا، وناطر مننا إننا نتفاعل معك ونثمر ثمر بيليق فيك، ويكون حضورنا حضورك بمحيطنا.

عطينا يا ربّ، سلامك وعطفك وحبّك تا نقدر نعيش الحياة كلّا على ضوء نعمك اللي ما بتنعدّ، ونعكس نورك عالناس.

/الخوري يوسف بركات/