بهالصباح المبارك، منرفعلك يا ربّ السما والأرض أعذب ألحان المجد والتسبيح، ومنشكرك على هالنهار المبارك اللي بتشرق فيه شمسك على الأخيار والأشرار.

منتأمّل يا ربّ، اليوم وكل يوم، بسرّ هالحياة ومنعرف قدّيش إنت رحوم وحنون وبتريدنا نكون معك ونبعد عن الشرّ المستشري بهالعالم واللي عم يغري كتير من النفوس الضعيفة ويبعدا عنّك.

وقديش بتحاول يا ربّ إنّك توعّينا تا نعرف وين أولويّاتنا بهالحياة، وما يكون الله هوي آخر همّنا، نعرف نعيش الحياة ونفرح فيها لأنّك إنت إله الفرح.

حصّتك يا ربّ بحياتنا كبيرة كتير، وكلمتك هيي الأولي بحياتنا، ساعدنا على إننا ننما بمحبتك ومحبّة الآخرين بكل يوميّات حياتنا.

/الخوري يوسف بركات/