بصباح هالنهار وبنهاية هالأسبوع المبارك، منرفعلك يا إله السما والأرض كل التسبيح والمجد والإكرام.
يا ربّي يسوع، إنت اللي إخترتنا متل ما نحنا، بضعفنا وبقوّتنا، بثباتنا وبهشاشتنا، وإنت وحدك اللي بتعرف ضعفنا وبتعرف قدّيش منحبّك وبدنا نكون معك ولإلك كل حياتنا رغم صعوبات حياتنا.
قدّ ما نفوت بسرّ حبّك يا ربّ ما رح نعرف ليش إخترت كل واحد وواحدة منّا بإسمو وعلى أيّا مقوّمات نقّيتنا تا نكون تلاميذك وتلميذاتك، بس اللي متأكّدين منّو إنّك بيّنا وخيّنا وإلهنا وحبيبنا.
يا ربّي يسوع، أكيد في هدف من إختيارك لإلنا بالرغم من إننا عم نلتهي بالقشور وما عم نختارك لإلك تا تكون الأوّل بحياتنا.
اليوم رح نتأمّل بحبّك وناخد مقصد فعّال بحياتنا إننا نرجع نصوّب رسالتنا بالحياة ونكون على قدّ المسؤوليّة وننشر فرحك وسلامك بمجتمعنا.
/الخوري يوسف بركات/
