بصباح هالأحد الفارح، واللي فيه عم نفرح مع زكريا بالبشارة بحبل أليصابات ، منسبّحك ومنمجّدك يا ربّ ومنباركك إنت القادر عا كل المستحيلات.

يا ربّ، كلنا إيمان إنّك إنت الله السهران علينا، واللي ما بتنعس ولا بتنام، الله اللي قدرتك بتتخطّى كل توقّعاتنا، الله اللي محبتك ما إلها حدود.

يا ربّ، كتير من الأوقات منصير نحاول إننا نحدّك بأفكارنا وإنت الغير محدود، منشوفك بعين ألـ "أنا" ومنقيس أعمالك بمقياس رغباتنا وإفادتنا الشخصيّة وإنت اللي كرمك غامرنا.

يا ربّ، علّمنا إنّو نصمت تا نقدر نصغي لهمساتك الرقيقة، ونسكّت الضجيج اللي فينا، ونوقّف هيجان الأفكار الشرّيرة اللي بتراودنا، تا نقدر نتأمّل بعطاياك ومواهبك اللي ميّزتنا فيون، ونآمن بوعدك لإلنا إنّك باقي معنا وما بتتركنا لو شو ما صار علينا، ونعلنك ملكنا وإلهنا.

/الخوري يوسف بركات/