مع العدرا مريم، إمنا وإمّ الحياة، منرفعلك يا ربّ كل التسبيح والمجد والإكرام.
بدخولك يا مريم عالهيكل، فتّي بعمق العلاقة مع إلهك وحبيبك اللي نقّاكي من قبل ما تولدي تا تكوني بمشروعو الخلاصيّ.
بدخولك يا مريم عالهيكل، إعترفتي بألوهيّة الربّ وملكوتو بحياتك، وعلّمتينا كيف نعرف نحطّ الربّ هدفنا وتكون لإلو الأولويّة بكل حياتنا.
بدخولك يا مريم عالهيكل، علّمونا أهلك القدّيسين يواكيم وحنّة كيف نسلّم ذاتنا وأهلنا وولادنا وعائلاتنا للربّ الإله، ونتعلّم منّن كيف مع كل ركعة صلاة نقدر نقدّم قلوبنا للربّ.
يا مريم، خليكي معنا وما تتركينا، وحملينا بإيديكي وبقلبك وودّينا لعند إبنك يسوع تا نكون معو بالملكوت.
/الخوري يوسف بركات/
