منرفعلك يا ربّ السما والأرض، أجمل أناشيد التسبيح والمجد، ومنشكرك على هالصباح اللي بتشرقو علينا.
كتير حلوة يا ربّ إنّنا نقول نحنا مسيحيّين، ونروح عالكنيسة، ونجتمع بالجماعة الموجودة ونعمل مشاريع معن، بس الأجمل والأصحّ هوّي إنّنا ننتمي لإلك يا يسوع روحيًّا وفكريَّا وعمليًّا.
يا ربّي يسوع، إنت علّمتنا وبتعلّمنا إنّو القرابة معك هيّي مش باللحم والدمّ وإنّما هيي بالروح اللي عطيتنا ياه عالصليب لمّن كرّستنا لإلك إخوة وأخوات وخلّيتنا نعيش معك القيامة من أعماق موتنا.
يا يسوعنا الغالي، إلنا الشرف إنّنا نكون إمّك وأخوتك وأهلك، ونستقبلك بيناتنا ونسمع كلامك اللي بيغنينا وبيغيّرلنا قلوبنا وحياتنا، تا نقدر نكون وجّك بين الناس.
/الخوري يوسف بركات/
