يوم بيروح، ويوم بيجي والإيام كلا عم تمضي وبعدك يا ربّ بتشرق شمسك علينا وبتحبنا رغم كل ضعفنا وأخطاءنا وهفواتنا، منشكرك ومنسبّحك ومنمجّدك.
كتار اللي بيزعّلو قلبك يا يسوع، ونحنا منن بأغلب الأوقات ، وإنت يا ربّ اللي بتستاهل كل التضحية والمحبّة ومش ناطر إلّا تا تسكب فينا فرح الخلاص.
كتار اللي بيجرحو قلبك يا يسوع، ونحنا منن بأغلب الأوقات، ومنصير نعيش الإستهتار بحبّك وما منعود تهتم إلّا بحسب أنانيّتنا، ومنتناسى حبّك اللي مشتاق لتوبتنا ولخلاصنا.
تعا يا ربّ، رغم لامبالاتنا، وغيّرنا بدمك اللي سفكتو عالصليب كرمالنا، وخلّينا نحملك لكل إنسان منلتقي فيه ونزرع فيه، متل ما زرعت وعم تزرع فينا، هالكنز الكبير والغالي، حبّك، اللي بيعطي السعادة الأبديّة.
/الخوري يوسف بركات/
