بصباح هالأحد المبارح، ومع القدّيس يوسف البتول، منرفعلك يا ربّ كل التسبيح والمجد والإكرام، ومنشكرك على خلاصك لإلنا.
سبحانك يا ربّ، بتضلّ باقي معنا بكل لحظة رغم كل أخطاءنا، ودغري بتتدخّل تا تنوّرلنا الطريق وتوجّه ضياعنا وتردّنا للطريق الصحيح اللي داعينا عليه.
سبحانك يا ربّ، دايماً بتوحيلنا بكلامك وبتعليمك قدّيش نحنا عزيزين عا قلبك، وبتأكّدلنا إننا أبناء وبنات لإلك مدعوّين نشهد إلك ولقيامتك بحياتنا، متل ما شهد قبلنا القدّيسين.
سبحانك يا ربّ، إنت اللي بيّنتلنا عمق محبّتك تجاهنا، وجسّدتا بإبنك الحبيب يسوع، وما خلّيتنا نتوه بتفكيرنا ونضيّع البوصلة صوب السما.
وصار دورنا نحنا إننا نعبّرلك عن مدى حبّنا وإنتماءنا لإلك، ونعطيك ذاتنا بكلّيتا، ونشهدلك بكلّ إيمان إنّك إلهنا وملكنا ومخلّصنا.
/الخوري يوسف بركات/
