بصباح هالنهار المبارك اللي فيه عم نتذكّر القدّيس مار نعمة الله الحرديني، منرفعلك يا ربّ السما والأرض كل التسبيح والمجد.
"الشاطر اللي بيخلّص نفسو"، وقدّيشنا بعاد عن هالمقولة للقدّيس مار نعمة الله، وقدّيش الأنانيّة عم تاكل من حياتنا ومن علاقتنا فيك يا ربّ، لهيك وأول شي لازم نعملو هوّي إننا نخلّص حالنا من الأنانيّة.
"الشاطر اللي بيخلّص نفسو"، وقدّيش كان مهمّ هالمشروع بحياة القديس نعمة الله، تا صار قدوة للرهبان تلاميذو ولكل الرهبان والناس وخصوصي للقديس شربل اللي عرف ترجم وعاش هالمقولة وصار قدّيس.
شو حلوة الحياة معك يا ربّ لمّن منشتغل على ذاتنا ومنسعى اننا نخلّص ذاتنا اليوم قبل بكرا، واكيد اذا عشنا بحسب تعاليمك رح نخلص ونتقدس ونقدّس غيرنا معنا.
/الخوري يوسف بركات/
