شو حلوة اللحظة اللي بيشرق فيها نور الصباح، تا يقلّنا إنّو بعد في حياة، وشو حلوة تكون هالحياة إنت مصدرا يا إلهنا الحبيب، منسبّحك ومنمجّدك ومنشكرك.
أصعب شي بالحياة يا ربّ، لمّا الإنسان يضلّ مكبّش بالأنانية، ولو مهما أنّبتو أو حسّستو بضرورة البعد عن الخطيّة تا ما يضيع بمتاهات العالم الفاني، بيقى معاند لأنّو ما بدّو يبتعد عن الخطيّة اللي بتجبلو لذّة وسعادة بس مؤقتة.
وياما وياما، يا ربّي يسوع، منكون فرّيسيين بحياتنا، نسخر منّك بالآخر، أو حتى من كلامك اللي بتدعينا فيه للتضحية ولمحبّة ومسامحة كل إنسان ، وحتّى الأعداء.
إنت يا ربّي يسوع، إنت الملك، ومملكتك هيي مملكة المحبّة والسلام، ما رح نقبل بغير مكان تا نكون فيه بعد هالحياة إلّا معك لأنّك وحدك عندك الحياة يا نبع الحياة .
/الخوري يوسف بركات/
