يا مريم، يا أمّ الله المتجسّد، مبارح إحتفلنا بولادة إبنك يسوع، الربّ الإله اللي صار إنسان متلنا تا يصيّرنا متلو، واليوم من الصبح جايين تا نهنّيكي لأنّك قبلتي إنّك تكوني إمّ لخالقك وجابلك وصانعك.
مع مريم العدرا منعظّمك يا ربّ، إنت القوي والقادر على كل شي، وإنت الإله العظيم اللي بيصنع إشيا كتير حلوة.
مع مريم العدرا بدنا نسبّحك، مريم هالصبيّة الصغيرة اللي تركت مشروعا الشخصي تا تلتحق بمشروعك الخلاصي، ومتل مريم العدرا بدنا نحاول نتخلّى عن كل شي بيخلينا نتعلّق بالأرضيّات.
منّك يا عدرا مريم، حابّين نتعلّم الصبر عا كل الأوجاع والمحن، وما نتعلّق بالأرضيّات متل اللي ما إلن إله، وبدنا نرفع عيوننا تا تتحوّل لبيت قربان، متل ما كانت أحشائك يا مريم بيت الملك، ونستقبل الإله يسوع بقلب مليان توبة ورجا وإيمان.
/الخوري يوسف بركات/
