بصباح هالنهار، ومع بداية هالأسبوع المبارك، منرفعلك يا ربّ كل التسبيح والمجد والشكر.
يا ربّ، الإنسان اللي خلقتو عا صورتك المتواضعة، بطبيعتو البشريّة بيصير همّو يكون شي مهمّ إن كان عا هالأرض إذا همو الأرضيات، أو بالملكوت السماوي إذا كان همّو الحياة معك، وهيدا اللي صار مع تلاميذك.
بس جوابك كان بعكس ما بيتصوّر الإنسان لمّن ربطتلنا الوصول للملكوت بالتواضع والوداعة والبراءة اللي عند الأطفال.
كتير من الأوقات منطرح عا حالنا السؤال: ليش الإنسان اللي مدعو للتشبّه فيك بالتواضع، بيصير يتكبّر ويتشامخ عا غيرو ويحتقر الآخرين، ومن ميلة بيوقع بهالفخ اللي نصبو لإلو الشيطان.
يا ربّ، نحنا ما بدنا غير رحمتك وحنانك يلفّونا، ونعيش الشهادة لإلك بتواضع ووداعة الأطفال، ونكون عم نعرف نمشي درب القداسة بأمانة ورجا وإيمان ثابتين.
/الخوري يوسف بركات/
