صباحنا معك اليوم يا ربّ مليان محبّة وتضحية وغفران، لأنّك إنت المحبّة والمغفرة بذاتن، وإنت اللي بتشرق علينا نور حبّك.
يا ربّي يسوع، معك ما في حدود للغفران، لأنّو عندك ما في حدود للمحبّة، إنت اللي حبّيتنا حبّ ما بينوصف لدرجة انّك غفرتلنا خطايانا بدمّاتك اللي سفكتن عالصليب.
وبدل ما نفكّر، متل ما سألك بطرس، عن مدى طاقتنا عالمغفرة لإخوتنا، بتدعينا يا ربّ تا نحبّ ونسأل عن قوّة محبّتنا للغير وقدّيش هوّي بحاجة للغفران.
ومتل ما إنت بتفيض علينا الغفران بلا حدود يا ربّ، ودعيتنا تا نستفيد منّو بفعل توبة حقيقي، هيك نحنا كمان، بدنا نمتلي من حبّك تا نفهم إنّنا ما رح نقدر نحصل عالملكوت، ولا رح نقدر نشترك بوليمة حبّك، إذا ما غفرنا وسامحنا وحبّينا من كلّ قلبنا.
/الخوري يوسف بركات/
