إلك يا ربّ منرفع عقولنا وأفكارنا، بصباح هالنهار المبارك، ومنشكرك عا حبّك العظيم اللي بتحبّنا ياه.

بكلامك وحدك، يا ربّ، منلاقي سلامنا وفرحنا، إنت الخبز اللي نزل من السما تا تسدّ جوعنا وتشبّعنا من كلامك العذب يا ربّ.

كلامك وحدو، يا رب، بيغنينا عن التفكير بحاجتنا للغذاء الجسدي، لا بل بيضلّ يذكّرنا بإنو جسدك ودمك كانو وبيبقو هنّي أساس حياتنا.

معك يا ربّ ما منخاف لأنّك بيّ حنون وما بتتركنا، نحنا أبناءك وبناتك، بتبقى بتهتمّ فينا وناطرنا تا نتّحد فيك كل يوم إن كان بالإنسان أو بالقربان المقّدّس.

إنت يا ربّ اللي كسرت الخبز وأشبعت الخمسة آلاف شخص من شوية خبزات وكم سمكة، ونوّرتلن طريقن وحياتن، نوّرنا تا نبقى معك وما نترك إيدك طول عمرنا.

/الخوري يوسف بركات/