ببداية هالأسبوع، وبصباح هالنهار المبارك، منرفعلك يا ربّ كل التسبيح والمجد ومنشكرك عا كل نعمك وعطاياك اللي بتفيضا علينا.
ممكن نستغرب يا ربّ طلب التلاميذ منّك إنّك تعلّمن كيف يصلّو، بس هيدا حال كل واحد وواحدة منّا لمّن منوقف قدّامك، ومنصير نضيع بأبيات المسبحة، أو منشرد بالقدّاس، أو منصير نفكّر بالحياة وهموما.
هيدا هوّي حالنا يا يسوع، دايماً مهمومين، وعم ننسى أو نتناسى إنّو الصلاة هيي مناجات وفعل تسبيح وطلب وشكر، هيي بالأحرى فعل حبّ منّا لإلك وجواب، ولو بسيط، عالمحبّة اللي حبيتنا ياها .
كيف بدنا نكون بحاجة للصلاة، يا ربّ، وإنت اللي علّمت تلاميذك وبتعلّمنا إنّو الصلاة هيي التواصل معك وإستعداد لعمل الروح القدس بالعالم من خلالنا.
لهيك رح نسعى إنّو تكون حياتنا كلها صلاة وتواصل معك.
/الخوري يوسف بركات/
