بصباح هالنهار الفارح، والشمس عم تشرق علينا وتنوّر هالدني من نورك يا ربّ، ما فينا إلاّ ما نسبّحك ونمجدك ونباركك ونشكرك عا حضورك معنا.
يا يسوع الحبيب، نحنا المؤمنين والمؤمنات فيك، واجهنا، وبعدنا عم نواجه، مشكلة وهيي إننا نتبعك ونكون معك للآخر.
عالصعيد البشريّ، كتير صعبة الطريق معك يا ربّ، وكلنا منعرف إنّو المشكلة فينا نحنا اللي ما عم نسلّم ذاتنا بكلّيتا لإلك ونحبّك متل ما بتحبّنا.
العالم المادّي يا ربّ عم يحاول يسرقنا منّك، وأوقات كتير عم ينجح إنّو يغرينا، مع إننا بالعمق ما بدنا نكون عبيد لإلو ولمغرياتو شو ما كانت.
يا إلهنا الحبيب، بدنا ياك إلك وحدك، إرحم ضعفنا، وقوّينا على إننا نطلع من ذاتنا أكتر، ونروح صوبك، ونعيش بحسب رغبة قلبك ونكون لإلك وحدك.
/الخوري يوسف بركات/
