بصباح هالنهار المنوّر بنورك يا إلهنا الحبيب، منرفعلك كل التسبيح والمجد والإكرام والسجود والوقار والشكر عا كل نعمك وعطاياك اللي بتفيضا علينا كل يوم.
يا ربّي يسوع، بكل حياتك اللي عشت فيها إنسان عالأرض، ولا مرّة فرضت ذاتك عالبشر، لا بل عشت التواضع التام وعطيتنا درس كبير بالتسليم لمشيئة الله.
يا ربّي يسوع، القوّة اللي كنت عم تعلن فيها حضور ملكوت الله واللي فيها كنت عم تشفي المرضى وتعلّم إننا نصغي لكلامك الدافي والشافي.
يا ربّي يسوع، إنت خلقت الإنسان وعطيتو الحريّة الكاملة يقدر فيها إنّو يرفض أو يقبل مشروعك الخلاصيّ بحياتو.
عظيم إنت يا ربّي يسوع، حتّى دينونتنا تركتلنا ياها تا نحدّدا، لهيك، بإيمان وثقة رح نسلّمك حياتنا تا تكون إنت الوسيلة والغاية تا نوصل لعندك.
/الخوري يوسف بركات/
