بكل صباح ومع كل طلعة شمس وبداية نهار جديد، كل التسبيح والمجد والإكرام بيليق فيك يا إله الكون.
ما في أخطر وأكتر من الرياء بحياتنا ومجتمعنا يا ربّ، لهيك إنت حذّرت الناس منّو، وبعدك بتحذّرنا منّو، وباقي عا وعدك، لأنّك عارف مدى خطورة الرياء اللي مالي قلوب ونفوس أغلبيّة الناس.
ومتل ما كانو الفريسيّين، بإيّامك يا ربّ، مشهورين بالرياء تا يحصلو عالمراكز، كمان بوقتنا الحالي في فرّيسيين عم يدعسو عا إخوتن وأصحابن وأهلن، بس تا يوصلو عا مركز أو طمعاً بالمال.
كتار فرّيسيي عهدنا الحالي، اللي قلت عنّن إنت يا ربّ: بيبينو من برّا حملان ومن جوا ذئاب خاطفة وناطرة تا تفترس اللي بيوقف بوجّا.
ما بدنا نكون من هالفئة، لا بل بدنا نكون، بنعمة الروح القدس، أبناء وبنات الصدق والأمانة اللي تحلّو فيون القدّيسين والقديسات.
/الخوري يوسف بركات/
