منرفعلك التسبيح والإكرام بهالصباح اللي فيه السما والأرض وكل اللي فيها بتعلن مجدك يا إلهنا الحبيب.
يا ربّي يسوع، بمثل التينة اللي بالكرم واللي ما عم تعطي ثمر، بتحطنا قدّام ذاتنا، وبتوعّينا على أهمّيّة المواهب اللي زرعتا فينا أولاً وقت خلقنا وتانياً وقتا لبسنا الروح القدس بالعماد، وبعدك ناطر إننا نفعّلا ونعطي ثمر تليق فيك.
قدّيشك عظيم يا ربّ تا حاطط ثقتك بكل واحد وواحدة منّا وتاركنا لحرّيّتنا نختار الحياة معك.
قدّيشك رحوم يا ربّ لأنّك بعدك ناطرنا وما عم تحسبلنا خطايانا بس شرط إننا نتوب عن أفعالها اللي ما بتليق فيك، ونرجع للحياة معك.
قدّيش بتحبّنا يا ربّي يسوع، تا دايما عم تعطينا الفرص إننا نرجع نبادلك الحبّ؟ رح نحاول ونضل نحاول وما نستسلم، من إننا نعطيك ذاتنا بكلّيّتا.
/الخوري يوسف بركات/
