منرفعلك يا ربّ آيات التسبيح والمجد والشكران، ببداية هالنهار وبكل لحظة من لحظات حياتنا.
يا يسوع الحبيب، كيف ما بدّو يآمن فيك الإنسان اللي بيتعرّف عليك وبيلاقيك حبّيتو قبل ما يخلق وهلق وبكل لحظة؟
يا يسوع الوديع، كيف ما بدنا نحبّك وإنت اللي عشت الوداعة والطاعة لمشيئة الله الآب؟ إنت اللي علّمتنا وبتعلّمنا كيف نعيش الصبر على كل الإشيا مهما كانت كبيرة أو صغيرة.
يا يسوع الرحوم، منشكرك على محبّتك اللي خلّتك تكون حاضر معنا، ومنفرح لأنّك رح تشفينا من كبرياءنا اللي بيبعّدنا عنّك وعن بعضنا البعض.
يا ربّي يسوع، بدنا نتشبّه فيك ونكون تلاميذك بالعالم بس ما عم نقدر نثبّت القول بالفعل، أعطينا نعمة الإصغاء تا نقدر نتعلّم كيف نصبر ونحبّ متلك إنت.
/الخوري يوسف بركات/
