مع إطلالة هالصباح المبارك، وببداية هالنهار الجديد اللي عم يحمل معو نورك يا ربّ، منرفعلك كل التسبيح والتمجيد.
يا إلهنا الحبيب، كل شي عا هالأرض وكل اللي منملكو هوي منّك ولإلك، وما في أجمل من إننا نتشاركو مع إخوتنا وأخواتنا اللي بحاجة لإلنا.
بس المشكلة بالأنانيّة اللي فينا، واللي بتضل تحاول تطمر الخير اللي فينا وتهدّم كل الوزنات اللي عاطينا ياها بفعل العماد بهدف تحقيق رغباتنا الذاتيّة.
يا ربّي يسوع، نحنا أمناء على كل الإشيا اللي منملكا، وهيي وسيلة بتودّينا صوب السما إذا عم نعرف نستخدما متل ما إنت بتريد.
نحنا كلنا إيمان فيك يا ربّ، وكلنا ثقة بإننا مولودين بهالحياة تا نعرف نعيشا بفرح معك ومع إخوتنا وأخواتنا اللي حويلينا، ومن خلالن بدنا نوصل لإلك يا إله الكون.
/الخوري يوسف بركات/
