الله معك...


بيخبرو عن إنسان كان عم يتعارك مع مصاعب الحياة، بيقرِّر يلتجي للطبيعة، وهونيك بيسمع صوت الربّ عم يندهلو.

وهيك بيدخُل ع الدير، وبعد سنين من الإختبار بيصير كاهن. 

بس المُفاجأة إنّو المصاعب الكبيرة، ضلِّت عم بتواجهو.

قدّام هالواقع، بيلتجي للربّ وبيقلّو :

«يا رب فهِّمني شو بدَّك منّي؟» 

بيجاوب الربّ :

«بدّي إيديك لَبارِك، وقلبَك حتَّى حِبّ، وشفافَك تَإحكي فِيُن، أنا بحاجة لإلك كِلَّك، حتَّى من خلالك خلِّص البشر، ولو مرّات كنت بحاجة لجسدك حتَّى إتألَّم». 




الزوّادة بتقلّي وبتقلَّك :

بالحياة في صُلبان كتيرة، تقبَّل صليبَك وإفتخر فيه، حتَّى يكون إلَك جِسِر عبور من حياة الشقاء لدنيا البقاء. والله معك.

المصدر : صوت المحبّة