ببداية هالسنة المباركة، بدنا نشكرك يا ربّ لأنَّك عم تشرق علينا شمسك، شمس المحبِّة والحنان.


حكمتك يا ربّ، ما حدا بيستوعبها إلّا اللي بيشوف وبيآمن إنَّك بتختار لكلّ إنسان الخير الأفضل ، وقد ما قطع علينا من خيبات أمل، هيدا كلّو تا نتأكَّد إنّو بالثبات فيك منستحقّ السعادة.

ولو فقدنا كلّ شي، يا ربّ، ما رح نفقد ثقتنا فيك.

وقد ما ضاقت فينا الدني، بتبقى وحدك أجمل رفيق، لأنَّك بتحبّنا وبتعرف كلّ شي بقلوبنا وبتجازينا بحسب أعمالنا.

كلنا إيمان فيك يا ربّ إنَّك رح تعطينا، بهالسنة الجديدة، كلّ النِعَم اللي بتخلّينا نتخطّى كلّ أمواج التجارب، ورح بتدبِّر أمورنا وبتعتني فينا، وبتشيل عنّا غيمات الحزن، ورح بتفرِّحلنا قلوبنا وتفتحلنا كلّ البواب المسكَّرة بوجّنا وتردِّلنا الفرح اللي فقدناه، بالسنة اللي قطعت، وتعوِّضلنا بالخير عن الأحزان اللي غلَّفتنا من ورا الأوبئة والحروب والموت.


يا ربّ، كلّنا رجا بإنَّك سمحت بكلّ هالمِحَن اللي مرقنا فيها، تا تزيدنا إيمان ونكون قادرين، بقوِّة الروح القدس، على إننا نتخطّى التجارب والصِّعاب اللي منواجهها.

/الخوري يوسف بركات/