الله معك...
بيخبرو عن مجموعة من الضفادع كانوا عم يتنقَّلو بالغابة... تنين مِنُّن وِقعو بجورة وجرَّبو يخَلصوا حالُن، بس مُحاولاتُن كانت عم تفشل، لدرجة إنّو ضفدعة من الضفدعتين ماتِت، وضلِّت التانية عم بتجرِّب تخلِّص حالها، وكانو رفقاتها الضفادع عم بيقولولها بأعلى صوتُن :
«ما بقا تتعبي، أكيد ما في نتيجة، بعد شوي رح بتموتي».
كانو عم بيصرخو بأعلى صوتُن، بس الضفدعة ما إستسلمِت حتَّى طُلعِت من الجورة.
ولـمّا شافِت رفقاتها شكرِتُن ع تشجيعُن وقالِتلُن :
«بسبب تشجيعكُن إلي، إنتصرت وطلُعت من الجورة».
رفقاتها الضفادع تعجَّبو من كلامها، حتَّى إكتشفو بالآخر إنها طرشا، ما بتسمع.
الزوّادة بتقلّي وبتقلَّك :
«ما تتأثَّر بكلام الناس يلّي مرّات كتيرة بيضعِّفلك عزيمتك... إتِّكِل ع الله وع حالك، بتنتصر ع كلّ الصعوبات». والله معك.
المصدر : صوت المحبّة
