هي عبارة عن حوار بين فتاتين وتبدأ بسماع الأغنية التالية :

الأغنية : بحبك بحبك حب مش مألوف .. ما بينحكى ولا بينوصف بحروف .. وقديش مرّوا على الدهر عشّاق متل حبي الدهر ما بيشوف...


البنت ١ :

يا ربّي قرّب عيد العشاق .. وشو حابة لاقي حدا يحبني هيك متل الأغاني..


البنت ٢ :

انا عندي حدا بيحبني حب حقيقي.. مش بس حب أغاني.. أحلى من هيك بكتير ..


البنت ١ :

ليش فيه أحلى من هيك ؟


البنت ٢ :

إيه طبعا فيه .. رح أقرأ لك الرسالة يلي بعتها حبيبي...


الرسالة:

حبيبتي الغالية:

لا تستغربي إني عم إبعت لك هالرسالة .. بعتتها لأني بحبك كتير كتير.

أنا بعرف كل شي عنّك وإنت بكل لحظة قدّامي ودايماً عيني عليكي.

وقت بشوفك زعلانة أو موجوعة أو تعبانة .. كتير بتضايق وبنوجع أنا كمان.

بحب أنّك تفرحي دايماً وتكوني مبسوطة دايماً.

إنت خلقتي لتعيشي بفرح مغمورة بالمحبة.. وبعيدة عن كل وجع وقهر.

كرمالك مستعد أعمل كل شي .. مستعد أتحمّل مسؤولية كل أخطائك وآخد كل أوجاعك .. ما عندي أغلى منّك.. بحبك أكتر ما بتتصوري .. ومستعد موت بدالك . .فداك .. بس إنت عطيني فرصة .. حاولي تتعرّفي عليّي .. جربي تحاكيني .. ووقتها ( يمكن أو رح ) تحبيني ..

مشتاق تردّي عليّي..


البنت ١ :

يا الله شو حلو .. معقول في حدا بيحب هيك .. وعن حقيقة ومش بس بالقصص والأغاني؟ نيالك.. يا ريت أنا كمان هيك بنحب..

طيب عرفتي مين باعت لك الرسالة و شو إسمه حبيبك؟


البنت ٢ :

حبيبي .. إسمه .. يسوع..ورسالته هي باعتها لكل العالم.

#خبريّة وعبرة
/خدّام الربّ/