بالتسبيح والتمجيد منبدأ صباحنا بهالنهار اللي عم تشرقو علينا من نورك يا إلهنا الحبيب.
صعب كتير هالطلب اللي عم تطلبو منّا يا ربّي يسوع.
كيف رح نقدر نغفر ليللي أذانا وبعدو عم يأذينا أو يهمّشنا أو يصغّرنا؟
صعب كتير علينا يا ربّ إننا نحبّ اللي ما بيحبونا واللي ما بيقبلونا.
كيف بدنا نغفرلن ونحصل عالخلاص اللي واعدنا فيه إذا ما عم نقدر نحبّن ولا حتى عم نعمل خطوة محبة وحنان تجاهن؟
جوابك يا ربّ عمل قلق للتلاميذ، لأنّو الغفران بحدّ ذاتو صعب وشبه مستحيل بالمنطق البشريّ لأنك عم تطلب منا إننا نغفر لما لا نهاية.
غريب أمرنا يا رب، مع إننا منعرف إنّو رح نحرم حالنا من غفرانك إذا ما غفرنا لغيرنا، وبعدنا معندين.
اعطينا النعمة يا رب تا نقدر نقبل الآخر بضعفو تا نقدر نغغرلو وتغفرلنا لمّن منلتقي فيك بالملكوت.
/الخوري يوسف بركات/
