بهالصباح المبارك اللي فيه عم بتبارك المزروعات وبتفيض علينا بركاتك منشكرك ومنرفعلك كلّ التسبيح والمجد يا إله السما والأرض وكلّ اللي فيها.


مع مريم العدرا إمّ الكلّ، منشكرك يا ربّ لأنَّك بعدك عم تدفق علينا خيرات الأرض، رغم بُعدنا عنها وتشويهنا لخيراتا.


مع مريم العدرا إمّ الكلّ، منشكرك يا ربّي لأنَّك تاركلنا المجال إننا نرجع عن خطايانا ونبعد عن كلّ شي بيضرّ الطبيعة وخيراتا.

مع مريم العدرا إمّ الكلّ، بدنا نشكرك يا ربّ لأنَّك حاضر معنا بكلّ لحظة من لحظات حياتنا، ولأنَّك بعدك عم تدعينا تا نمشي معك الطريق صوب السما قد ما كانت صعبة وضيقة.

وكيف ما بدنا نشكرك يا ربّ لأنَّك عاطينا العدرا مريم إمَّك الحنونة تا تكون إمّ لكلّ واحد وواحدة مِنّا، بتحبّنا وبتحمينا وبتخاف علينا وبترفعنا لعندك، وبتطلب منَّك إنَّك ترحمنا وتنجِّينا من كلّ التجارب ونفرح بملكوتك.

/الخوري يوسف بركات/