مع اطلالة هالصباح اللي فيه بيشرق نورك علينا يا ربّ، منرفعلك التسبيح والمجد والإكرام.


بكلام بسيط، ولكن مليان سلطان، دعيت يا يسوع تلاميذك وخاصَّةً الرُسُل الأربعة الأوائل وخلَّيتُن يحسّو بالسلام والأمان هنّي ومعك.

بكلام بسيط، ولكن مليان سلطان، دعيت يا يسوع هالتلاميذ تا يتحوَّلو من صيّادين سمك، عم يهتمّو بحالن ويعيشو كيف ما بدُّن، لصيّادين بشر، هَمُّن إنُّن يهتمّو بالآخرين وكيف يجذبوهن لإلك.

بكلام بسيط، ولكن مليان سلطان، دعيت يا يسوع رُسُلَك ونقلتن من الموت المُحتَّم للحياة معك اللي ما إلها نهاية.

وبكلام بسيط، ولكن مليان حُبّ، دعيت تلاميذك يا يسوع تا يحبّو بعضُن بعض، ويحبّو حتَّى اللي ما بيحبّوهن.

ونحنا حبَّينا هالكلام المليان حُبّ وسلام وفرح، ولا مخلوق بهالكون بيقدر يعطينا هالفرح.

ورح نبقى معك يا إلهنا الحبيب.

/الخوري يوسف بركات/