بصباح هالنهار البارد، واللي فيه عم تدفق خيراتك عالأرض، منرفعلك كلّ التسبيح والمجد والشكر مع كلّ خليقتك اللي كوَّنتا بكلمة مِنَّك يا إلهنا الحبيب.

مع الرسل، اللي عم نتذكَّر دعوتك لإلُن، منتوقَّف، كلّ واحد وواحدة مِنّا، ولو للحظات، تا نحطّ ذواتنا بين إيديك وتحت نظرك يا ربّ.

مع هالرُسُل، اللي من خلالُن وصَّلتِلنا البشارة فيك يا ربّ، منحطّ قلوبنا وعقولنا قدّامك يا ربّ تا نقدر نصغي لكلامك الحَيّ اللي من خلالو منقدر نفوت بالعلاقة معك للعمق ونشوف الدني بعيونك.


مع الرُسُل، اللي دعيتُن تا يمشو معك درب القداسة يا ربّ، بدنا نمشي معك المسيرة بطريق النور، وحاطّين قدّامك ضُعفنا تا تقوّينا، وأنانيّاتنا تا ترجِّعنا لحالة النعمة، ورغباتنا وشهواتنا تا توعّينا عا نعمة التجرُّد اللي بتوصِّلنا للملكوت.


بدنا نقدِّملك ذواتنا يا ربّ متل ما هيّي، ونحنا كلّنا رجا بإننا نكون عم نعكُس نورك بحياتنا وبالعالم.

/الخوري يوسف بركات/