منرفعلك كلّ آيات التسبيح والحمد والإكرام يا إلهنا الحبيب ومنشكرك عالحياة اللي عم تنعم فيا علينا بالصباح المبارك.


بعد ما نقَّيت تلاميذك يا ربّ بأسماءن، وخلَّيتن يتعرَّفو عليك أكتر وأكتر، دعيتُن من البداية إنُّن يعرفو يطلبو الأساس واللي هوّي ملكوت الله.


ومن بعد ما دعيت تلاميذك، يا يسوع، وجَّهتُن على إنُّن يكونو صادقين وواثقين بالربّ اللي قادر على إنّو يستجيب طلباتُن إذا كانت لخيرن ولبنيان الآخرين.


ومن بعد ما وجَّهت تلاميذك لطلب الخير، أرسلتُن بين العالم تا يكونو عمّال صالحين بكرم الربّ، كرم الرسالة، ويهَيئو عمّال للحصاد الكبير.


ونحنا يا ربّ عم نحاول بكلّ قوِّتنا وبإتِّكالنا عالروح القدس، رغم ضعفنا، إننا نكون هالعمّال بكرمك، وكلّ هدفنا إننا نبشِّر بِحُبَّك كلّ إنسان منلتقي فيه، ونكون صورة صادقة عن التلميذ الصالح، ونتخلّى عن كلّ شي بيبعِدنا عنَّك تا نربح السما والحياة الأبديِّة معك.

/الخوري يوسف بركات/