منسبّحك ومنعظّمك ومنباركك يا ربّ بهالصباح المليان محبِّة ورحمة وحنان، ومنشكرك عا عطاياك وكَرَمَك اللي ما إلو حدود.


يا يسوعنا الحبيب، الكرمة الحقيقيِّة اللي بتعطينا ثمر ما بينوصف ولا بينقطع، نحنا أبناءك وبناتك، اللي جعلت مِنّا غصون لكرمك، عيوننا وقلوبنا وأفكارنا مرفوعة صوبك بفرح لأنَّك إنتَ اللي بتملّيها حياة.


يا إلهنا الحبيب، النبع الصافي اللي بيروي عطش كلّ محتاج وعطشان، نحنا أبناءك وبناتك، اللي منترجّى كلّ يوم إننا نرتوي مِنَّك، عم نِسعى بكلّ قوِّة وثبات فيك إننا نعرف نعيشَك ونخبِّر عنَّك كلّ إنسان منلتقي فيه.


يا عريسنا السماوي، نحنا بدنا نفوت عالعرس، بس أفكارنا السيئة وشهواتنا ورغباتنا وأنانيِّتنا عم توقَف حاجز وما عم بتخلّينا نوصَل عالملكوت.


يا سيِّد الأسياد وربّ الأرباب، يسوع المسيح، كلّ شي بهالدني زايل وما إلو طعمة من دون ما تكون فيه نفحة مِن حُبَّك وقلبك، ونحنا بدنا نحِبّ مِتلَك تا نكون معك.

/الخوري يوسف بركات/