بصباح هالنهار المبارك منرفعلك يا ربّ آيات التسبيح والمجد، ومنشكرك عا كلّ نِعَمَك وعطاياك يا إلهنا الحبيب.


عجايب كتير عمِلتا عالأرض يا ربّ وقتا تجسَّدِت وصُرت إنسان متلنا، بس اللي بتستوقفنا منُّن هيّي هالأعجوبة اللي فيها رجَّعتلّو البصر للأعمى.


نحنا أكيدين يا ربّي يسوع إنَّك ما بتتوقَّف عالأعمال الخارجيِّة، لا بل بتفوت وبتغيِّر الإنسان بالعُمق، متل ما فتحتِلّو بصيرتو لهالأعمى اللي آمن فيك، الله معو.


ورغم كلّ اللي بتعملو للإنسان، بيبقى في اللي بيرفضوك وبينكرو ألوهيّتك، وهدفُن الوحيد إنُّن يحطّموك تا هنّي يبقو المرجع الوحيد للشعب.


ونحنا كمان، في مِنّا اللي متل الفرّيسيّين، بيسألو ويدقِّقو وكلّ هدفُن إنُّن يحطّمو الآخرين، وفي مِنّا اللي بيسألو تا يآمنو ويصيرو تلاميذك، نعيش حياتنا بحسب تعاليمك ووصاياك الصعبة علينا يا إلهنا الحبيب.

/الخوري يوسف بركات/