صبحيِّتنا اليوم معك يا ربّ، وسط كلّ الأوضاع اللي عم نمرق فيها، بتبقى مليانة فرح ورجا بحضورك معنا وبقلوبنا وبحياتنا.


صُعبِة عالإنسان يا ربّ إنّو يكون عايش بحسب تعاليمك، بس مش مستحيل تطبيقا.


والأصعب هوّي علينا، نحنا أبناءك وبناتك، المدعوّين إننا نعكُس صورتك وحُبَّك بقلب هالعالم اللي عم يحاول يغرينا بشهواتو.


بهالأزمات اللي عم تفتُك فينا وبالعالم، منلتجي لإلَك تايبين يا ربّ ومنطلب مِنَّك الرحمة عا كلّ مرَّة ما عرفنا عكسنا نورك للآخرين.


بهالأوضاع الصعبة اللي عايشين فيها، منتوقَّف قدامك يا ربّ وقدّام ذاتنا تا نشوف حالنا إذا عم نستسلم للخطيِّة والطمع والأنانيِّة، أو عم نسعى تا نضلّ ثابتين فيك وبمحبّتك ومحبِّة إخوتنا اللي بحاجة إلنا.

إنتَ حياتنا يا ربّ وكلامك هوّي أساس طريقنا صوبك.

/الخوري يوسف بركات/