بنهاية هالأسبوع، وبصباح هالنهار المبارك، منرفعلك يا ربّ أجمل التسابيح والمجد والشكران.


كتير مهمّ علينا، نحنا اللي منآمن فيك يا ربّي يسوع، إننا نتأمَّل بآلامك اللي من خلالا عطيتنا الخلاص، والإنتقال من الموت للقيامة.


كتير مهِمّ يا ربّ إننا نعبُر من الجمعة العظيمة بحياتنا، من آلامنا وأوجاعنا وأحزاننا بهالحياة، لسبت النور اللي فيه منعيش إنتظار القيامة، تا نوصل للقيامة معك من خطايانا ومن الصعاب اللي كانت وبعدا عم تعترض حياتنا معك ولقاءنا فيك.


بس الأهمّ عندك يا ربّ هوّي إنتقالنا من مرحلة الإختبار الشخصي معك لمرحلة الشهادة الحقيقيِّة اللي بتخلّينا نساهِم، من خلال طريقة عيشنا بحسب تعاليمك، بتوصيل البشرى لكلّ اللي منلتقي فيه أو منعيش معو أو بيسمعنا، ونكون الدافع لإلو بإنّو يختبر الحياة معك من خلالنا ويتوصَّل إنّو يشهدلك بحياتو.

/الخوري يوسف بركات/