بصباح هالأحد الفارح اللي فيه عم بيسبّحوك الأبرار والصدّيقين اللي عاشو حياة القداسة عا هالأرض، منرفعلك يا ربّ كلّ المجد والتسبيح.


بهالنهار منتأمَّل يا ربّ بمراحل حياتنا، ومنحاول نفتِّش عن صورتك الحلوة والبهيِّة اللي طبعتِلنا ياها بقلوبنا، ومنتساءل إذا باقية فينا أو بعدنا عم نشوفك بهالمجروحين اللي موجودين حوالَينا من كلّ الجِهات.


منتأمَّل اليوم برحمتك اللي زرَعتا بقلوبنا، ومنتساءل إذا شاركنا أو بعدنا عم نشارك المتألّمين أوجاعُن وعم نحاول نداويلُن جروحاتُن ونلطِّفا بلمسة حنان.


منتأمّل اليوم بمحبّتك المجّانيِّة اللي حبَّيتنا ياها، ودعيتنا تا نحِبّ مِتلَك، عم نلاقي حالنا بعدنا بعاد عن هالمحبِّة ومنتعلَّم كيف نفتِّش عن الجوهر، بدل ما نلتِهي بقشور الدني وملذّاتا.


واليوم رح نكون قد المسؤوليِّة اللي حمَّلتنا ياها يا ربّ ونترافق مع إخوتك الصغار بمسيرة القداسة معك وصوبك.

/الخوري يوسف بركات/