بصباح هالعيد المبارك اللي فيه عم تظهر للعالم إنَّك الله، منرفعلك أسمى آيات التسبيح والمجد والسجود والإكرام والشكر يا إله السما والأرض.

منشكرك يا بيّنا السماوي على عطاياك اللي ما بتنعَدّ واللي بتعطيها لكلّ واحد وواحدة مِنّا بمجّانيِّة.

والشُكر الأكبر لأنَّك خلقتنا وجلعتنا أبناءك وبناتك من خلال سرّ العماد المقدَّس.

ومنشكرك لأنَّك بتهتمّ فينا وبترعانا أكتر من إهتمامك ورعايتك لكلّ خلايقك.

منشكرك عا صوتك القدّوس اللي بيحكينا ليل نهار وبيهمُس بقلوبنا وبضمايرنا إنَّك ما بتتركنا نضيع لأنَّك بيّنا.

منشكرك يا ربّي يسوع، إبن الله الآب، لأنَّك عطيتنا الخلاص من خلال سرّ العماد المقدَّس اللي بيحرِّرنا من الخطيِّة ونتايجا السلبيِّة علينا، وبيرجِّعلنا النقاوة اللي لبسناها بالروح القدس اللي بيصيِّرنا أبناء لألله الآب وأخوة لإلك يا الله الإبن ومنمشي بإرشادات الله الروح القدس ونشهد بحياتنا وقدّام الكلّ عا حضور وفعل الثالوث الأقدس بحياتنا.

/الخوري يوسف بركات/