أجمل ما في بالحياة هوّي لمَّن منِصحا الصبح ونحنا كلنا ثقة إنّو في عَنّا ربّ، بَيّ وخيّ ورفيق، هوّي إنتَ يا إلهنا الحامينا واللي عم تشرق نورك علينا.


أجمل شي منسمعو ببداية هالصباح هوّي كلامك يا ربّ اللي فيه بتسمّينا الملح للأرض والنور للعالم، إنتَ اللي بتعطي المعنى للحياة وللنور اللي بالحياة.



ولمَّن بتدعينا تا نكون ملح الأرض، قدَّيش عندك ثقة فينا يا ربّ بإننا نحنا ممكن نكون معنى الحياة لغيرنا ونور لدربن صوبك.


بس كمان قدَّيش ممكن نكون سبب شكّ على إنّو هالنور يصير ظلام من ورا أنانيِّتنا وشهواتنا وخطايانا اللي بتخلّي حياتنا سَودا وضبابيِّة وظلاميِّة.


منشكرك يا ربّ لأنَّك حمَّلتنا مسؤوليِّة نقل كلمتك، كلمة الحياة للناس، ولأنَّك نوَّرت قلوبنا تا تكون نور ينوِّر عتمة قلوب كتيري بعيدة عنَّك.


همّنا الوحيد يا ربّ إننا نكون عا قد ثقتك فينا ونكون ملح الأرض ونور العالم.

/الخوري يوسف بركات/