ما في أجمل من الصباح هوّي وعم يشرق بنورك، وتكون الخليقة كِلّا عم بتسبّحك وتمجّدك يا ربّ السما والأرض.


يا يسوعنا الحبيب، الطريق معك مليان صعوبات ومطبّات، ومع هيك حلو وعميق.


وتا نقدر نمشيه لازم نتخطّى ذاتنا وكلّ الإشيا الأرضيِّة ، ونِعلا معك بالروح ونسلّمك كلّ أفكارنا وحواسنا تا تنقّيها.


يا ربّي يسوع، إنت اللي علّمتنا إنّو اللي بيعمل لهالعالم رح يبقى عملو بهالعالم ورح يموت معو، وبتختفي عَنّو طريق الملكوت لأنّو منطقو إنسجم مع الخطيِّة وأفكار هالعالم، بينما اللي بيعمل للحياة معك وكلّ هَمّو كيف يحبَّك ويرضيك رح بتكون السما قريبة مِنّو لأنّو منطقو إنسجم مع كلامك وصار يعيشو بحياتو.


ونحنا يا ربّ، أبناءك وبناتك اللي حبَّيتنا وعطيتنا ذاتك، بدنا نبادلك هالمحبِّة من خلال أعمالنا اللي رح بتعبِّر عن إنتماءنا لإلَك لأننا إنغرسنا فيك يا شجرة الحياة.

/الخوري يوسف بركات/