منرفعلك يا ربّي يسوع، بهالصباح المبارك، أعذب ألحان التسبيح والتمجيد والشكر عا كلّ نِعَمَك وعطاياك.

يا إلهنا الحبيب، إنتَ السرّ الأسمى، وفيك منلاقي كلّ كنوز الدني، ومنها الحكمة اللي بتجعلنا نعرف نواجه كلّ الأمور الصُّعبِة، واللي بتخلّينا نعرف كيف نحمل الصليب ونتخلّى عن ذاتنا تا نرجع نستعيدا ونكون تلاميذ حقيقيّين لإلَك ونشبهَك يا معلِّمنا الأوحد.

يا إلهنا الحبيب، حدّ الحكمة، بدنا تزيدنا من المعرفة اللي بتخلّينا نتقرَّب مِنَّك أكتر وأكتر، ونلتصق فيك، ويصير فكرنا فكرك، وقلبنا قلبك، وكلامنا كلامك يا يسوع.


يا إلهنا الحبيب، بدنا نعرفك ونغوص فيك أكتر وأكتر تا نصير نقدر ندلّ الناس عليك بأقوالنا وبأفكارنا وبأعمالنا اليوميِّة تا حتَّى نصير نشبهك، إنتَ اللي قلتلنا : حسب التلميذ أن يكون مثل معلِّمه.

يا إلهنا الحبيب، بدنا ياك تعلِّمنا كيف نخلّي اللي بيلتِقو فينا يشوفو كيف عم ندلّ عليك متل ما عمل يوحنّا المعمدان ونعترف إنَّك إنتَ مُخلِّص العالم ومخلّصنا.

/الخوري يوسف بركات/