منرفعلك يا ربّ، آيات التسبيح والمجد والإكرام والشكر عا كل نِعَمَك وعطاياك اللي فضتا وبعدك عم بتفيضا علينا بكلّ لحظة من لحظات حياتنا.

صعب هالحكي اللي عم يحكيه يوحنّا المعمدان يا ربّي يسوع وقاسي، بس حقيقي.

والحياة معك يا ربّ هيّي أكيد غير الحياة اللي عم نعيشا بهالعالم الأرضي الفاني.

الحياة معك يا ربّ ملياني فرح وسلام وأمان، وما حدا بيقدر يعيشا إلّا اللي بيآمن فيك بإنَّك الله الحضر دايماً معنا وإنَّك إنتَ وحدك منبع هالفرح وهالسلام.

الإيمان فيك يا ربّ، والعيش عا هالأساس هوّي الحقيقة الأساسيَّة لحياتنا المسيحيَّة، وعا هالأساس بدنا نعيش يا ربّي يسوع واللي بيتطلَّب مِنّا شغلتين أساسيتين :

أوَّل شغلة لازم نعمِلا تا نعيش حقيقة إيمانّا فيك يا ربّ هيّي إننا نتخلّى عن أنانيّاتنا وعن كلّ شي بيصدر منها ونعمل بحسب مشيئتك ومش مشيئتنا.

وتاني شي والأساس هوّي إننا نعيش بحسب وصيتك، وصيِّة المحبِّة اللي وصَّيتنا ياها ونحبّ كلّ الناس بقلبك.

/الخوري يوسف بركات/