إلَك بيليق التسبيح والشكران يا ملك الملوك، ربّنا يسوع المسيح، السما والأرض وكلّ ما فيها بيمَجّدوك.
يا إلهنا ومُخلِّصنا الحبيب يسوع، بهالزمن المقدَّس اللي فيه بتدعينا على إننا نتعالى عن ذاتنا وعن أنانيِّتنا، منتمنّى ومنشتغل تا الصوم اللي عم نصومو يعلِّمنا كيف نترك كلّ شي فاني بهالعالم ونتحرَّر فيك تا نوصل لعندك لمَّن منعبُر هالحياة وكلّ شي فيها.
يا إلهنا ومُخلِّصنا الحبيب يسوع، رجانا، نحنا كنيستك، إننا نكون، بقوِّة الروح القُدُس، عم نعرف نحمل كلّ إنسان خاطي وميِّت بالخطيِّة، ونِجي فيه لعندك تا تسكب فيه حياتك الإلهيِّة وترجعلو الحياة.
يا إلهنا ومُخلِّصنا الحبيب يسوع، جايين لعندَك بأتعابنا وضعفنا تا تخلِّصنا منها وتلمس نعوشنا اللي مكبّلِتنا وتلفّنا بنور جسدك الأقدس ودمك المُحيي تا نقدر نشهد عا كلّ النِعَم اللي بتفيضا علينا يا نبع الحياة.
